Un seminario analiza na Mariña a formación no eido do turismo vinculado á natureza

Achegar aos alumnos universitarios, investigadores e profesionais vinculados cos campos da xestión do territorio, da biodiversidade e do turismo, unha visión integradora das novas perspectivas do turismo de natureza así coma dos criterios de sustentabilidade que deben rexer este tipo de turismo e o obxectivo das Xornadas de Turismo de natureza que se desenvolverán en Foz dende hoxe e ata o domingo, 17 de abril. O Instituto de Biodiversidade Agraria e Desenvolvemeto Rural (IBADER) do Campus de Lugo en colaboración co concello de Foz, o Ministerio de Medio Ambiente e Medio Rural e Mariño e a Deputación provincial de Lugo (Área de turismo) promove este curso de formación, que estará dirixido por Pablo Ramil Rego, vicerreitor adxunto de Investigación e Innovación da USC. A xornadas contarán coa participación de importantes expertos en educación ambiental, xestores de espazos naturais, especialistas na xestión do uso público e desenvolvemento sostible pertencentes ás distintas Universidades Galegas, entidades como CEIDA ou CETMAR, empresas ambientais, a Deputación Provincial de Lugo e o Ministerio de Medio Ambiente e Medio Rural e Mariño. As actividades desenvolverase ao longo da fin de semana do 15, 16 e 17 de abril en horario de mañá e tarde no Centro de Interpretación da Mariña (CENIMA), emprazado na localidade de Foz, e tamén na Escola Obra Pía de Fazouro, dedicando a última das xornadas á visita dos espazos naturais da Mariña Luguesa. A duración do curso é de 30 horas e é validable por un crédito de libre de configuración para todos os estudantes da USC que así o soliciten.