Seminario sobre permacultura no marco do proxecto de hortos urbanos da USC

A permacultura ou agricultura permanente centrará a vindeira semana un seminario organizado no marco do programa USC en Transición. Será João Domingues, permacultor e investigador na USC no eido das enerxías renovables e ecoaldeas, quen explique este tipo de prácticas o martes 8 ás 19:30 h na Aula 5 da Facultade de Bioloxía e por videoconferencia no Salón de Actos da Facultade de Formación do Profesorado de Lugo. A entrada será libre ata completar aforo.

A permacultura é o deseño consciente e mantemento de ecosistemas agrícolas produtivos coa diversidade, estabilidade e resistencia dos ecosistemas naturais. Constitúe un dos piares sobre os que se sustentan as comunidades en transición que buscan dar unha resposta colectiva aos problemas ambientais actuais.