O Servizo de Deportes da USC no Campus de Lugo presenta a súa proposta de actividades para os meses de xuño e xullo

O Servizo de Deportes da USC no Campus de Lugo presenta a súa oferta de actividades para o mes de xuño e a primeira quincena de xullo. Como remate do calendario do curso 2011-12, o servizo coordinado por Jesús Castro propón algunhas das actividades que máis éxito tiveron durante o ano, e que se ofertaron por primeira vez, como pilates ou danza oriental. Todas as actividades incluídas nesta convocatoria están abertas ao público en xeral. O acto de presentación das actividades deportivas da USC no Campus de Lugo terá lugar o martes 29 ás 11.30 horas na Vicerreitoría de Coordinación de Planificación e estará presidido polo vicerreitor de Coordinación e Planificación do Campus de Lugo, Pedro García Herradón, e o responsable do Servizo de Deportes da USC no Campus de Lugo, Jesús Castro López. Homenaxe aos medallistas da USC Ademais de dar a coñecer a oferta deportiva para este último tramo do curso, o acto servirá como homenaxe aos atletas da USC Manuel Hurtado e Paula Ferreiros Fernández, medallistas no campionato universitario de atletismo celebrado en Salamanca entre os días 4 e 6 de maio pasados. Manuel Hurtado Sanjurjo é tamén o último gañador da medio maratón da Coruña, celebrada o pasado domingo.