Un simposio europeo trata en Odontoloxía a abordaxe do tabaquismo na clínica dental

Especialistas nacionais e internacionais, entre os que se atopan os profesores de Psicoloxía da USC Elisardo Becoña e Ana López Durán, serán os relatores do simposio europeo que este venres 25 na Facultade de Odontoloxía aborda o tabaquismo na clínica dental. É unha acción formativa enmarcada dentro do proxecto Erasmus+ ‘Smoking Cessation Advice’ para o adestramento de profesionais sanitarios na deshabituación tabáquica e na que ademais da USC participan as universidades de Birmingham, Burdeos e Milán e a Cooperativa de Ensinanza Superior Politécnica Universitaria de Porto (CESPU).

No Salón de Actos de Odontoloxía baixo a coordinación do profesores Jacobo Limeres e Márcio Diniz, o simposio desenvolverase ao longo de catro horas nas que se abordarán aspectos tales como a epidemioloxía do tabaquismo en Europa e as súas consecuencias na saúde, o papel do tabaco na enfermidade periodontal e periimplantaria, o cáncer oral e os trastornos potencialmente malignos da cavidade oral e a abordaxe do tabaquismo dende a consulta dental. Ademais, presentarase a web ‘ Consellos para deixar de fumar: formación para o persoal sanitario’. O simposio conta coa colaboración da Sociedade Española de Periodoncia e Osteointegración (SEPA), entre outras institucións de referencia.