A solidariedade do estudantado da USC suma 6.000 euros para un proxecto en Malí

A Universidade de Santiago leva dúas décadas participando na Olimpíada Solidaria de Estudo, unha iniciativa de Coopera ONGD e xestionada polo Servizo de Participación e Inclusión Universitaria pola que durante un mes se cambian horas de estudo nas bibliotecas universitarias por euros para proxectos solidarios, a razón de 1 euro por 1 hora. Unha vez rematada a vixésimo primeira edición o pasado 15 de marzo, a USC volve facer un balance moi positivo: participaron 1.693 estudantes cunha recadación de 5.780 horas/€, o que a converte na terceira Universidade de todo o Estado en diñeiro recadado, só por detrás de Zaragoza e Granada.

As bibliotecas da USC que tiveron un mellor resultado foron a de Concepción Arenal en Compostela (con 2982 horas e 819 estudantes), a de Bioloxía (655 horas e 212 estudantes) e a Intercentros (523 e 140, respectivamente). Séguenlles as da Escola Técnica Superior en Enxeñaría, a de Ciencias Económicas e Empresariais e a de Matemáticas.

Entre todas as entidades participantes lográronse reunir 48.063 horas solidarias de 12.400 estudantes, que se converteron noutros tantos euros, un montante que se vai sumar ao proxecto que, cun custe total de 120.000 euros, comezou a executarse na Comuna de Mandé (Malí), axudando directamente  596 persoas beneficiadas e indirectamente máis de 5.370 persoas. Co diñeiro obtido, favorecerase o desenvolvemento socioecónomico da comunidade gandeira de Mandé a través da produción gandeira e a transformación de produtos lácteos, con especial impacto nas mulleres e na poboación infantil.