Seis titulacións da USC entran no Ránking 50 Carreiras de 'El Mundo' 2025

Un total de seis titulacións de grao da USC acaban de ser recoñecidas polo ránking que cada ano o diario El Mundo elabora para establecer a listaxe dos 50 programas máis demandados polo estudantado español e as cinco mellores universidades para cursalos. Así, a Universidade de Santiago de Compostela ocupa o terceiro posto en Óptica e Optometría, así como en Odontoloxía; o cuarto chanzo, en Farmacia e Enxeñaría Química; e o quinto, en Historia e en Nutrición e Dietética.  

A clasificación elabórase en base a catro tipos de indicadores. Así, o 30% da cualificación obtida sae dunha enquisa voluntaria, anónima e aleatoria a docentes universitarios. O 50% emana da información subministrada polos propios centros universitarios, mentres que outro 10% xorde da opinión de máis de 100.000 empregadores de todo o mundo. O 10% final procede de información extraída doutros estudos externos.