Trócanse horas de estudo por euros para proxectos solidarios

A comunidade universitaria da USC terá a posibilidade de colaborar na reconstrución de 14 escolas de Kivu Sur, na República Democrática do Congo. Poderá facelo se do 5 de novembro ao 5 de decembro se achega ás 18 salas de estudo e bibliotecas que en Santiago e Lugo a USC pon a disposición da X Olimpíada Solidaria. O procedemento é sinxelo: cada hora de estudo nas bibliotecas e salas habilitadas para o proxecto correspóndense con 1 euro. Cando a persoa entra e sae da sala debe introducir a Tarxeta Universitaria de Identidade (TUI) no ordenador preparado ao efecto, sempre tendo en conta que non se computarán períodos superiores ás catro horas consecutivas e menores a unha hora A actividade, organizada pola ONGD Coopera e Cooperación Internacional e que conta co apoio da USC a través do Servizo de Participación e Integración Universitaria, pretende cada ano recadar fondos para un proxecto educativo concreto. Tamén nesta ocasión a institución compostelá buscará volver ser a primeira en número de cartos recadados, como a pasada edición na que a USC achegou 19.583 euros. En Santiago colaboran coa iniciativa as Bibliotecas Xeral e Concepción Arenal e as salas de estudo das Facultades de Bioloxía, Ciencias da Comunicación, Ciencias da Educación, Económicas e Empresariais, Farmacia, Filosofía, Física, Matemáticas, Medicina e Odontoloxía, Psicoloxía, Química, Xeografía e Historia e a Escola Técnica Superior de Enxeñaría. Para trocar horas de estudo por euros en Lugo as persoas interesadas deben acudir á Biblioteca Intercentros ou ás Facultades de Formación do Profesorado e de Veterinaria.