A túa opinión sobre a Biblioteca, ten premio

Adaptar a biblioteca ás necesidades dos distintos colectivos da comunidade universitaria. Con este obxectivo a Biblioteca da USC iniciará este xoves 23, coincidindo co Día do Libro, un proceso para avaliar o grao de satisfacción dos seus usuarios cos servizos recibidos baixo o lema ‘Fai que a túa opinión conte!’.
A enquisa poderase cubrir dende o 23 de abril ata o 8 de maio a través da web. Para elo, profesores, investigadores, alumnos, e persoal de administración e servizos recibirán no seu enderezo electrónico unha invitación para participar. Ademais, entre todos aqueles que colaboren coa iniciativa, a Biblioteca vai sortear cinco e-books (dispositivos de lectura de libros electrónicos).
A información recompilada a través da enquisa permitirá detectar as oportunidades de mellora deste servizo universitario, resultando imprescindible para emprender accións que permitan aumentar a súa calidade. No proceso, a Biblioteca conta co asesoramento e colaboración da Área de Calidade da Vicerreitoría de Calidade e Planificación Estratéxica.