Últimos días para optar ao décimo segundo Premio Aresa

As persoas aspirantes a optar ao décimo segundo premio Aresa teñen de prazo ata este venres 14 para presentar a súa candidatura. O galardón, dotado con 10.000 euros no que é o importe máis elevada neste tipo de certames en Galicia, recoñece o labor de persoas ou entidades que contribúen a mellorar a calidade de vida e o benestar das persoas vinculadas ao medio rural galego. Ao premio poden concorrer candidaturas a título persoal ou propostas por universidades, grupos de investigación, institucións, asociacións, empresas ou calquera outra entidade que contribúa ao desenvolvemento da economía rural galega. Os interesados deben presentar nos rexistros dos campus universitarios de Santiago e Lugo un traballo de I+D, unha iniciativa empresarial innovadora ou unha traxectoria persoal ou institucional nos ámbitos agrícola ou gandeiro. O ditame do xurado darase a coñecer na segunda quincena do mes de decembro e a entrega do galardón será a comezos de 2012.