Unidades didácticas, unha colección da USC para a edición de materiais docentes de calidade

Co proxecto docente e editorial da USC Unidades Didácticas, materiais docentes de calidade, trátase de apoiar, baixo os criterios que marca o Espazo Europeo de Educación Superior, o traballo de profesores e alumnos no desenvolvemento de todas as materias e titulacións da universidade á vez que facer un esforzo de galeguización na docencia.
Este luns presentáronse doce novas Unidades Didácticas elaboradas por catorce docentes do Campus de Lugo para materias de sete titulacións. Estes novos títulos véñense sumar aos 21 xa existentes, o que fai un total de 33 unidades didácticas xa dispoñibles. Todos eles pódense descargar gratuitamente na páxina web do Servizo de Normalización Lingüística.
Na presentación interviñeron a vicerreitora de Cultura, Elvira Fidalgo; o director do Servizo de Normalización Lingüística, Manuel Núñez Singala; e o director académico e o director técnico do Servizo de Publicacións, Antonio Azaustre e Juan L. Blanco Valdés, respectivamente.
Doce novos Os títulos que hoxe se presentaron son ‘Clases de palabras’ para a materia Lingua Española I do Grao de Lingua e Literatura Española; ‘As industrias lácteas. Os seus inicios e o despegue da actividade de transformación’ para Historia da gandería e as industrias lácteas do Máster en Economía e Industria Leiteira; ‘Trematodoses’ e ‘Bioquímica da Lactación’ para Enfermidades parasitarias e Aspectos básicos e clínicos da lactación, respectivamente, ambas as dúas do Grao en Veterinaria; e ‘Equilibrios ácido-base’ da materia Química analítica do Grao Enxeñaría Industrial de Procesos.
As outras unidades son ‘Introdución ao laboratorio químico’ para Química experimental e ‘Introdución á química de coordinación’ para Química inorgánica II de Enxeñaría Técnica Industrial especialidade Química Industrial; ‘Subclases Hamamelidae’ de Botánica Forestal e ‘Histoloxía vexetal’ de Anatomía e fisioloxía vexetal para Enxeñaría Técnica Forestal; ‘A historia da xardinaría e o paisaxismo’ de Tecnoloxía da xardinaría e o paisaxismo’ da titulación Enxeñaría Técnica Agrícola especialidade de Hortofruticultura e xardinaría; ‘O medio rural e as políticas agrarias. A UE’ de Socioloxía Rural das Enxeñarías Técnicas Forestal e Agrícola; e, finalmente, ‘Introdución ás ecuacións diferenciais ordinarias’ da materia ‘Fundamentos matemáticos da enxeñaría’ da Enxeñaría Técnica Agrícola.
Proxecto de éxitoO proxecto, impulsado dende a Vicerreitoría de Cultura e o Servizo de Normalización Lingüística, desenvólvese en dúas partes que xa foron experimentadas con éxito nos tres últimos cursos académicos nos dous campus da USC. Así, a parte previa é un curso para a elaboración das unidades que se imparte ao profesorado interesado e a final céntrase no seu proceso de produción, a partir do documento elaborado persoalmente por cada docente, que integra todos os criterios impartidos no curso.
Neste sentido, o curso para a elaboración das Unidades Didácticas –que conta coa axuda da Secretaría Xeral de Política Lingüística e que este ano se imparte en Santiago no mes de xuño- é un magnífico exemplo de integración de diferentes segmentos universitarios nun produto común: os criterios didácticos son impartidos por profesorado da Facultade de Ciencias da Educación; os criterios estilísticos e lingüísticos por persoal técnico do Servizo de Normalización Lingüística e os criterios de elaboración editorial e tipográfica por persoal técnico do Servizo de Publicacións. Tanto é o interese que esperta este curso que a última matrícula cubriu as prazas dispoñibles en tan só vinte minutos.