A Universidade de Santiago organiza o I Foro de Emprego da USC co obxecto de facilitar a inserción laboral dos seus titulados e a súa promoción no mercado laboral

A Universidade de Santiago de Compostela organizará entre os vindeiros días 14 e 15 o I Foro de Emprego da USC co obxectivo de facilitar a inserción laboral dos seus titulados e a súa promoción no mercado laboral. Organizado a través do Servizo de Apoio ao Emprendemento e ao Emprego (SAEE) da Vicerreitoría de Comunidade Universitaria e Compromiso Social, o evento diríxese a empresas, organismos públicos, estudantes e recén titulados.
Con este evento, a USC abrirá as súas portas para que as empresas e institucións se acheguen a coñecer aos universitarios de maneira directa, contando cun espazo dende o que recoller currículos e presentar aos visitantes as súas ofertas de emprego, programas de prácticas e sistemas de acceso ás súas empresas. Tamén ofrecerá a oportunidade de coñecer os recursos e servizos de apoio para a busca de emprego ou desenvolvemento de proxectos empresariais.
O foro conta coa promoción e patrocinio de entidades como as consellarías de Traballo e de Educación e Ordenación Universitaria da Xunta de Galicia, o Consello Social da USC, o Concello de Santiago, e organizacións e empresas como Caixa Galicia, RepsolYPF ou Accenture. Ademais, participarán ao redor de 30 empresas e entidades mais procedentes de todos os sectores e de implantación galega, nacional e internacional, Colexios Profesionais e portais de emprego.
Para acadar máis información sobre as actividades programadas así como as condicións de participación, as persoas interesadas poden visitar a páxina web do Foro http://www.forodeempregousc.com/