A USC achega I+D a Hispanoamérica para aumentar a produción sostible de cultivos e frear o cambio climático
Investigadores de universidades hispanoamericanas de Colombia, Ecuador e Guatemala implicados no programa de doutoramento internacional Agricultura e Medio Ambiente para o Desenvolvemento, un programa coordinado polo catedrático da USC Agustín Merino García, buscan no Campus Terra da USC solucións científicas e técnicas para incrementar a produción sustentable de cultivos agrícolas nos seus territorios sen acelerar os efectos do cambio climático.
A delegación académica iberoamericana, formada polos investigadores da Escola Politécnica Superior de Chiomborazo (Espoch) de Ecuador Magdy Echeverría e Andrés Beltrán, así como pola tamén docente na Universidade dos Andes Attila Lenti, e polas investigadoras do Centro de Estudos do Mar e da Acuicultura (CEMA) da Universidade San Carlos de Guatemala Irene Franco e Karla Paz, aproveitaron a estadía realizada no Campus de Lugo cunha bolsa Erasmus KA 1007 para intensificar a implicación das súas respectivas institucións académicas no doutoramento internacional en Agricultura e Medio Ambiente para o Desenvolvemento, pero tamén para abordar novas liñas de investigación acaídas para resolver problemáticas medioambientais propias dos seus países.
A protección dos solos do altiplano, un dos ecosistemas do planeta, xunto cos bosques da Amazonía, que máis carbono acumula, neste caso en forma de materia orgánica, e a posta en valor deste recurso como ferramenta para loitar contra o cambio climático, foi unha das liñas de traballo abertas pola investigadora ecuatoriana Magdy Echeverría, quen acadou o compromiso de investigadores do Campus de Lugo da USC para colaborar en estudos orientados a cuantificar o carbono presente nestas altas superficies.
As inquedanzas investigadoras expostas pola delegación colombiana aos investigadores do Campus de Lugo atinxen ao estudo e desenvolvemento de alternativas que garantan cando non incrementen a produción de cultivos agrícolas como o café ou o cacao sen necesidade de poñer en marcha explotacións intensivas que acentúen a destrución de biomasa forestal. Neste caso, as propostas recibidas dos investigadores da USC apuntan cara sistemas agroforestais que posibiliten o cultivo en sombra tanto de café como de cacao.
As liñas de traballo propostas polas investigadoras do Centro de Estudos do Mar e da Acuicultrua (Cema) da Universidade de San Carlos de Guatemala están máis ligadas co ámbito da acuicultura e de feito, Irene Franco e Karla Paz, acompañadas da coordinadora do doutoramento en Agricultura e Medio Ambiente para o Desenvolvemento na Facultade de Veterinaria, Cristina Castillo, mantiveron tamén diversas reunións de traballo coa tamén docente e investigadora na Facultade de Veterinaria Maribel Quiroga.
Alén de intercambiar información e estreitar a relación entre investigadores dun e doutro lado do Atlántico, a presenza desta delegación científica hispanoamericana permitiu avaliar novas posibilidades de produción e potencial subministro de materias primas na actual conxuntura bélica que se está a rexistrar en Europa por mor da guerra en Ucraína.
