A USC apela ao respecto institucional e ao cumprimento dos acordos e pactos asinados a respecto da impartición do Grao de Medicina
A Universidade de Santiago de Compostela recibe, cada ano, 403 novos estudantes que se matriculan no Grao en Medicina. Esta cifra incrementouse recentemente co obxectivo de dar cumprimento á necesidade formativa de novos profesionais da Medicina no sistema sanitario galego manifestada polas autoridades competentes, que a Consellaría de Sanidade cifra entre 300 e 400 nun informe do 23 de abril do presente ano.
A USC non soamente cumpre cun grao de excelencia sobresaliente co que a sociedade galega demanda neste ámbito, senón que tamén atende, respecta e cumpre os acordos e pactos asinados co resto de institucións que conforman o Sistema Universitario de Galicia como son a propia Xunta de Galicia e as Universidades da Coruña e Vigo.
Posición institucional
O convenio asinado o día 5 de outubro de 2015 polas tres universidades do SUG e a Consellarías de Sanidade e Educación establece, de xeito claro e unívoco, que a Facultade de Medicina e Odontoloxía da USC será a única que imparta o Grao en Medicina no SUG, correspondendo a responsabilidade académica do mesmo aos órganos de goberno e os departamentos da Facultade de Medicina e Odontoloxía da institución, que serán os encargados da planificación e organización docente da titulación, sen prexuízo da colaboración das Universidades da Coruña e de Vigo e do SERGAS na docencia clínica, conforme ao estipulado no propio convenio. Ademais, especifícase que a colaboración na docencia clínica é un medio complementario de atención docente que non afecta ao réxime ordinario de prestación de servizos docentes da USC nin á política de prazas que a USC desexe aplicar no exercicio da súa autonomía.
Polo anteriormente exposto, e facendo fincapé no respecto institucional que consideramos esencial para establecer calquera diálogo no SUG, a USC continuará a respectar, de xeito escrupuloso, o asinado no día 5 de outubro de 2015, que tamén aceptaron e, así mesmo, asinaron a Universidade da Coruña, a Universidade de Vigo e as Consellarías de Sanidade e Educación. Esta posición institucional foi avalada polo Consello de Goberno, que hoxe se reuniu.
Obxectivos da USC a respecto da impartición do Grao en Medicina
A USC ten como obxectivo prioritario seguir involucrando a todo o sistema sanitario galego na docencia clíncia do Grao en Medicina. Así, e coa fin de garantir a excelencia na impartición deste título, a USC conta coa colaboración dos centros hospitalarios de Santiago, Lugo, Vigo, Coruña, Pontevedra, Ourense e Ferrol, ademais da rede de centros de saúde.
Cando se cumpren case dez anos da descentralización da docencia 6º curso, avánzase tamén na descentralización da docencia clínica de 5º para o ano académico 26/27 co fin de que o estudantado reciba a mellor formación posible. Así, na sesión ordinaria do Consello de Goberno do día de hoxe, acordouse convocar dúas prazas de profesor titular vinculado con servizos do CHUAC.