A USC impón, a título póstumo, a súa Insignia de Ouro ao 'último mestre da República'

“O que hai que facer é axudar a crecer en liberdade, axudar aos ‘pequerrechos’ a ser o que queiran ser e, sobre todo, amalos e ser feliz facéndoo” afirmaba Gonzalo Anaya Santos, o último mestre da República e catedrático de Filosofía da Escola de Maxisterio da Universidade de Santiago entre 1953 e 1973. Anaya Santos recibirá a título póstumo a Insignia de Ouro da USC nun acto protocolario que se vai celebrar o vindeiro martes 25 no Paraninfo da Universidade e no que tamén se presentará un volume conmemorativo.
O homenaxeado exerceu a docencia ata o seu falecemento en xuño deste mesmo ano, polo que está considerado o último mestre da República, que é precisamente como lle gustaba autodefinirse. O seu discurso educativo reivindicaba unha “ensinanza educativa”, coherente co precepto constitucional e fundamentada na proclamación dos Dereitos Humanos.
O recoñecemento da USC sumarase a outras distincións das que Gonzalo Anaya era posuidor como a Medalla de Prata ao Mérito no Traballo ou a Medalla da Universidade de Valencia.