A USC presenta o `Proxecto e+s Miño' aos representantes dos concellos da Reserva da Biosfera Terras do Miño

Os coordinadores do ‘Proxecto e+s Miño’ que promove a USC en colaboración coa Consellería de Traballo e Benestar e o Grupo de desenvolvemento rural Terra Chá, reuniranse este venres 20, ás 12:00 horas, no edificio CACTUS do campus de Lugo, cos alcaldes e técnicos de emprego dos concellos incluídos na Reserva da Biosfera Terras do Miño para darlles a coñecer este proxecto que pretende activar os recursos naturais dos municipios para crear emprego, mellorar a calidade de vida dos seus habitantes e levar a cabo unha modernización ambiental das empresas xa existentes na zona.
Na xuntanza estarán presentes representantes dos 26 concellos incluídos en Terras do Miño, todos eles situados na conca alta deste río, e que no ano 2002 recibiron da Unesco a máxima catalogación medioambiental: A Pastoriza, Abadín, Alfoz, Baralla, Begonte, Castro de Rei, Castroverde, Cospeito, Friol, Guitiriz, Guntín, Láncara, Lugo, Meira, Mondoñedo, Muras, O Corgo, O Páramo, O Valadouro, Ourol, Outeiro de Rei, Pol, Rábade, Riotorto, Vilalba e Xermade.
O `Proxecto e+s Miño’ desenvolverase ata o mes de maio do ano 2011, co obxectivo de promover a formación ambiental dos traballadores dos concellos implicados, incrementando a súa cualificación e competencia, promovendo a incorporación da sostibilidade ás empresas e a adaptación das actividades económicas á normativa ambiental. Ademais, pretende detectar novas oportunidades de negocio ligadas á conservación e valorización do entorno da Reserva da Biosfera Terras do Miño.