Veterinaria acolle o mércores 17 a exposición ‘Con nome de muller’, que rotará polo campus de Lugo ata xuño

O programa de apoio ao emprendemento feminino da Universidade de Santiago de Compostela, Woman Emprende, traerá o mércores a mostra monográfica ‘Con nome de muller’, unha exposición de xénero a través da que se pretende achegar ás/aos estudantes e ao público en xeral experiencias concretas de emprendementos protagonizados por mulleres. Esta mostra, que poderá visitarse a partir deste mércores na Facultade de Veterinaria de Lugo, percorrerá a partir da primeira semana do mes de maio os distintos centros universitarios do campus de Lugo ata finais de xuño.

O vicerreitor de Coordinación e Planificación do campus de Lugo, Pedro García Herradón; a vicerreitora de Responsabilidade Social e Calidade, Benita Silva Hermo, o decano da Facultade de Veterinaria, Germán Santamarina, e a directora do programa Woman Emprende da USC, Eva López, inaugurarán o mércores 17, a partir das 11.30 horas, na sala de exposicións Isaac Díaz Pardo da Facultade de Veterinaria de Lugo a mostra ‘Con nome de muller’, Este singular proxecto cultural, que chega ao campus de Lugo logo de permanecer aberta ao público no claustro do compostelán Colexio de Fonseca alá polo outono de 2011, amosa, mediante exemplos tomados do pasado e tamén do presente a relevancia da iniciativa feminina e o seu valor como instrumento de creación de riqueza e benestar. Os promotores desta iniciativa xerminada na Universidade de Santiago de Compostela, pero aberta a toda a sociedade, buscan traer de novo á memoria episodios do pasado que, con frecuencia, tenden a esquecerse, ademais de poñer especialmente en valor poñer en valor a figura e os logros acadados por tantas e tantas mulleres. O legado destas emprendedoras aínda hoxe serve para transmitir á mocidade a necesidade de ter sempre unha actitude positiva e proactiva ante a vida.