As VI Xornadas ‘Educación e linguas en Galicia’ analizan os dez anos de aplicación do Decreto do Plurilingüismo

A Comisión de Normalización Lingüística da Facultade de Ciencias da Educación impulsa as VI Xornadas ‘Educación e linguas en Galicia’ que terán lugar os vindeiros días 7 e 8 de novembro. Este foro aborda as luces e as sombras da aplicación do Decreto do Plurilingüismo nos centros dos diversos niveis educativos, desde infantil ata a universidade.

O Decreto do Plurilingüismo promulgouse a principios de 2010 no medio dunha gran controversia política e pública sobre as linguas oficiais en Galicia, apuntan dende a organización das xornadas. Logo destes dez anos de aplicación, a Comisión de Normalización Lingüística da Facultade de Ciencias da Educación considerou a oportunidade de realizar unha análise sobre como se está implementando o Decreto nos centros dos diversos niveis educativos e os resultados lingüísticos e non lingüísticos en canto á adquisición de competencias por parte do alumnado segundo o marco legal, que sitúa como obxectivo a igualdade de competencias en galego e castelán, as dúas linguas oficiais. Neste senso, a organización subliña que o decreto introduciu a posibilidade de impartir materias non lingüísticos en idiomas estranxeiros.

As xornadas pretenden analizar que significa que un centro escolar sexa oficialmente plurilingüe e que planificación e estratexia se require para selo; saber se existe a suficiente coordinación interna entre os diversos departamentos afectados; ou descubrir se melloraron as competencias en inglés do alumnado destes centros. Ademais o foro analizará o influxo da adquisición de competencias en galego (lingüísticas e actitudinais); a limitación de horas docentes vehiculadas en galego; a adquisición por parte do alumnado dun bo nivel nas materias que se imparten en inglés; e a determinación de se hai algún perigo de elitización e desigualdade do ensino.

Programa

Logo de introducir o marco legal que debuxa o Decreto do Plurilingüismo mediante un relatorio a cargo do profesor Nel Vidal, as xornadas abordarán a experiencia da implementación desta norma en centros de infantil, primaria e secundaria mediante tres mesas redondas nas que participarán direccións de centros, profesorado-titor de infantil e primaria, e profesoras de Lingua Galega, Lingua Inglesa e Física e Química, así como o responsable do Seminario de Sociolingüística da Real Academia Galega.

Ademais, as xornadas tamén servirán para que a propia Facultade de Ciencias da Educación realice unha autocrítica en relación á formación (socio)lingüística que o alumnado das titulacións que imparte recibe do centro. Serán catro estudantes do centro os que reflexionarán sobre esta cuestión na mañá do venres 8 de novembro, desta volta na sede do Campus Vida. Finalmente, a profesora Rosalía Fernández Rial, doutora en didáctica das Linguas, propoñerá no seu relatorio estratexias para mellorar o ensino dos idiomas.

Inscrición e recoñecemento

As xornadas están dirixidas, preferentemente, ao alumnado e ao profesorado da Facultade de Ciencias da Educación, así como de Filoloxía e Formación do Profesorado de Lugo, aínda que tamén están abertas a calquera persoa interesada. O prazo de inscrición nas xornadas está aberto de balde nesta ligazón ata o 5 de novembro As 200 prazas cubriranse por orde de chegada. As persoas que asistan recibirán un diploma de asistencia por nove horas.