Voces Ceibes recibe o vindeiro xoves unha homenaxe con motivo do 40 aniversario do seu primeiro concerto na Facultade de Medicina

Integrantes do grupo Voces Ceibes e de Ataque Escampe ofrecerán o vindeiro xoves 4 un concerto homenaxe organizado pola USC nun acto que conducirán Manuel Pombo Arias e Bea Méndez a partir das 20:00 horas no Salón de Actos da Facultade de Medicina.
Esta sesión homenaxe irá precedida do descubrimento na mesma Facultade dunha placa dedicada aos membros da comunidade universitaria represaliados durante o franquismo. Ademais, os integrantes do grupo tamén descubrirán outra no mesmo Salón de Actos do centro en conmemoración do 40 aniversario dos primeiros concertos ofrecidos por Voces Ceibes, o primeiro o 26 de abril de 1968 e o seguinte xa o día 1 de decembro no Capitol.
Voces Ceibes é un movemento musical que xorde nas aulas da institución docente compostelá nuns momentos de tensa conflitividade e que se estenderán ao longo do curso 1967-1968. Algúns dos integrantes deste colectivo son hoxe membros do profesorado da USC como Guillermo Rojo ou Jaime Barreiro.