Voces Ceibes resoaron de novo en Medicina

Voces Ceibes, cualificada como ‘a banda sonora da loita antifranquista en Galicia’, resoou de novo este xoves na Facultade de Medicina. A actuación de Xavier del Valle, Vicente Araguas, Miro Casabella e Bibiano tivo lugar no transcurso dunha homenaxe que a USC lles tributou e á que acudiron compañeiros e amigos desta formación que ateigaron de novo, corenta anos despois, o paraninfo da facultade.
A maioría dos integrantes do grupo asistiron a esta homenaxe, na que descubriron unha placa con debuxos de Acisclo Manzano, no mesmo Salón de Actos do centro, en conmemoración do 40 aniversario dos seus primeiros concertos, o primeiro o 26 de abril de 1968 e o seguinte xa o día 1 de decembro no Capitol.
Neste emotivo acto aproveitouse ademais para descubrir outra placa dedicada aos membros da comunidade universitaria represaliados no curso 1967/1968 e a todos os que loitaron pola liberdade durante a ditadura franquista.
Voces Ceibes xurdiu nas aulas da institución docente compostelá nuns momentos de tensa conflitividade e que se estenderon ao longo do curso 1967-1968. Algúns dos integrantes deste colectivo son hoxe membros do profesorado da USC como Guillermo Rojo ou Jaime Barreiro.