Xa está aberto o prazo das bolsas Santander de prácticas en Pemes

Un total de cinco mil universitarios/as de toda España poderán realizar prácticas profesionais remuneradas en pequenas e medianas empresas ao longo de 2014 a través do programa de bolsas Santander de prácticas en Pemes. Esta convocatoria xurdida en 2011 é froito dunha liña de colaboración entre a entidade bancaria, a Conferencia de Reitores de Universidades Españolas (CRUE) e a Confederación Española da Pequena e Mediana Empresa (CEPYME), á que se sumou en 2013 a Confederación Española de Novos Empresarios (CEAJE). A duración das prácticas será dun mínimo de tres meses ampliable ata seis. O prazo de inscrición permanecerá aberto ata o 31 de xaneiro de 2014, mentres que as prácticas deberán desenvolverse entre o 10 de febreiro e o 30 de setembro do vindeiro ano. Cada unha das bolsas estará dotada con 600 euros ao mes para as de xornada completa e 300 euros para as de media xornada. Este é un programa orientado a complementar a formación do estudantado universitario español, a través do achegamento á realidade do ámbito profesional e da posibilidade de ampliar os seus coñecementos ao tempo que se favorece o contacto coas empresas que poderían facilitarlles a súa inserción laboral.