A xestión dos aproveitamentos madeirables do monte centrará o martes un debate na EPS

O Grupo de Innovación Educativa Ruralia e os Departamentos de Economía Aplicada e de Historia Contemporánea da Escola Politécnica Superior de Lugo desenvolven dende hai catro anos as xornadas ‘ O mundo rural a debate’. No marco delas este martes 15 desenvolverase na Escola a mesa redonda ‘A posta en valor das superficies de monte: a xestión dos aproveitamentos madeirables’. As xornadas pretenden achegar ao alumnado do campus a realidade actual do rural galego aplicando unha perspectiva baseada non tanto nos contidos académicos como na experiencia que poden trasladar distintos axentes ou colectivos ligados a esta realidade. Esta cuarta edición céntrase en dous ámbitos temáticos: os usos e potencialidades dos montes –a tratar neste primeiro cuadrimestre- e a produción ecolóxica –no segundo- a desenvolver en sesións abertas ao público en xeral aínda que particularmente dirixidas ao alumnado do Campus de Lugo e aos profesionais que traballan no mundo rural.

En concreto no debate do martes, ás 16:00 horas na sala de xuntas da EPS, intervirán os presidentes das Comunidades de Montes Veciñais en Man Común de Santo Estevo (Guitiriz) e Santa Cristina (Borreiros), David Díaz e Xosé Alfredo Pereira, respectivamente, así como o técnico da Mancomunidade de montes veciñais do Sur de Lugo, José Luis Vázquez.