A xornada ‘Habelas, hainas’ demostrará como as matemáticas están presentes en todos os ámbitos da vida

‘Habelas, hainas’ é unha xornada de carácter divulgativo da investigación matemática, destinada fundamentalmente a estudantes de grao ou máster. Esta iniciativa botará a andar o vindeiro xoves 26 de novembro, entre as 16.00 e as 19.00 horas, na Aula Magna da Facultade de Matemáticas, co obxectivo de presentar de xeito amable a investigación que se está a facer no centro e demostrar que esta ciencia está presente actualmente en todos os ámbitos da vida. As intervencións poderanse seguir en liña a través de Teams.

As persoas interesadas en asistir de xeito presencial deberán inscribirse de balde na Secretaría Virtual ata o 25 de novembro xa que se ofertan un máximo de vinte prazas. As persoas asistentes terán dereito a un diploma acreditativo por tres horas. Tamén poderán ter dereito a diploma as persoas que se inscriban na Secretaría Virtual para asistir a través de Teams ata un máximo de 150 prazas. En todo caso, a través de Teams poderá seguir a xornada calquera persoa que o desexe.

Programa

Charlas de vinte minutos impartidas por seis investigadores e investigadoras mozas da Facultade, que intentarán presentar dun xeito desenfadado e sinxelo para que se empregan e que son as Matemáticas, nutrirán o programa da xornada. “Esta iniciativa serve para normalizar o uso do galego nas matemáticas, deixando de lado prexuízos lingüísticos e prohibicións, neste mes de novembro, en que se celebra a Ciencia en Galego”, apuntan dende a organización. Esta é unha iniciativa da Comisión de Normalización Lingüística da Facultade de Matemáticas e do Seminario de Iniciación á Investigación (SII) do centro, co apoio do Servizo de Normalización Lingüística.