Xornada de presentación de resultados do Programa ERASMUS for Young Entrepreneurs

A incubadora de empresas da USC UNINOVA, organiza unha xornada para presentar os resultados acadados no marco do programa europeo de mobilidade ERASMUS for Young Entrepreneurs , do cal Uninova é Intermediary Organisation. A xornada celebrarase o venres 25 no Edificio Emprendia da Universidade de Santiago (Campus Vida), en horario de 9.00 a 16.00 horas. A xornada está aberta ao público e a inscrición é gratuíta, previo rexistro enviando un email a rosamaria.sanchez [at] usc.es (rosamaria[dot]sanchez[at]usc[dot]es) antes do 24 de xaneiro.

Este programa permite que emprendedores/as cun plan de empresa elaborado e/ou cunha PEME xa creada -pero que conte con menos de tres anos de experiencia levando a súa propia empresa- poidan realizar unha estadía formativa de entre 1 e 6 meses cun empresario experimentado doutro país da Unión Europea de entre os participantes no programa (entre eles, Albania, Armenia, Bosnia-Herzegovina, República de Macedonia, Islandia, Montenegro, Moldavia, Serbia, Turquía e Ucraína) e dende abril de 2018 tamén de Estados Unidos (dos estados de Nova York e Pensilvania), Singapur e Israel (nestes casos, a duración máxima da estadía é de 3 meses). Os emprendedores recibirán unha bolsa por parte da Unión Europea cuxo importe dependerá do país no que se realice a estadía.

Durante esta xornada, ademais dos resultados acadados polo consorcio liderado por Uninova no marco do Programa ERASMUS para novos emprendedores nos últimos dous anos, vanse presentar os programas de apoio ao emprendemento da propia USC e intervirán expertos/as internacionais no eido do emprendemento (en especial no emprendemento femenino e no sector TIC), ademais de dar conta escoitar, de primeira man, das experiencias de tres emprendedores da Universidade compostelá e dun empresario de acollida participantes en edicións previas deste programa con Uninova.