A doutora da USC Olalla Vázquez, galardoada pola European Young Chemist Award

A doutora Olalla Vázquez, que realizou a súa tese de doutoramento na USC baixo a dirección dos profesores do Centro Singular de Investigación en Química Biolóxica e Materiais Moleculares (CIQUS) José Luis Mascareñas e Eugenio Vázquez Sentís, acaba de ser galardoada coa medalla de prata dos premios European Young Chemistry Award (EYCA), entregados na cerimonia de clausura do 4th EuCheMS Chemistry Congress en Praga. O premio concedido a Olalla Vázquez, que actualmente desenvolve a súa formación posdoutoral na Humboldt-Universitaet zu Berlin cun contrato Marie-Curie, recoñece fundamentalmente o traballo realizado durante a súa tese doutoral no Departamento de Química Orgánica da USC e no CIQUS. Premios como este poñen en valor a investigación de primeiro nivel que se desenvolve na Universidade compostelá, e nomeadamente no CIQUS. Os premios EYCA, outorgados bianulmente polo Consiglio Nazionale dei Chimici (CNC) e a Sociedade Química Italiana (SCI), recoñecen e difunden a investigación de alto nivel desenvolvida polo persoal científico novo no ámbito das ciencias químicas. O premio, ao que este ano se presentaron 50 candidaturas, consta de dúas categorías: 35 anos e tese doutoral, esta última na que se recoñeceu á doutora da USC. As persoas finalistas tiveron que participar nun proceso moi competitivo durante o congreso de Praga, supervisado por un xurado composto por destacadas personalidades do mundo da química como son o Premio Nobel R.H. Grubbs e os profesores Aquilanti e Brabec, na que cada unha presentaba o seu traballo e era sometida a unha serie de preguntas por parte do xurado e a audiencia presente. Para o fallo final tivéronse en conta criterios relacionados coa excelencia e repercusión do traballo no ámbito da química, a orixinalidade e independencia da achega científica, a rigorosidade e profundo coñecemento da área de investigación e a consciencia das súas perspectivas futuras.