Unha delegación da Universidade Peruana La Molina visita Lugo no marco dun proxecto de ensinanza a distancia

O vicerreitor de Coordinación do Campus de Lugo, Carlos Herrero Latorre, recibiu este xoves a unha delegación da Universidade Nacional Agraria La Molina de Perú. Trátase dunha visita previa a un seminario de formación que se celebrará nos vindeiros días en Santiago e no que a universidade peruana trata de desenvolver un proxecto de Aula Virtual sobre alimentos funcionais.
Os profesores e xestores TIC da Universidade La Molina pretenden coa creación desta Aula Virtual converterse nun referente para outras universidades e institucións latinoamericanas no eido da formación a través da rede. O Instituto de Ciencias da Educación da USC, o Centro de Supercomputación de Galicia e a Aula de Produtos Lácteos colaboran neste seminario sobre Tecnoloxía dos Alimentos que está financiado pola Dirección Xeral de Cooperación Exterior da Xunta de Galicia.
A profesora e coordinadora do programa, Fanny Emma Ludeña, o profesor de Tecnoloxía Alimentaria, David Carlos Campos, e a profesora e enóloga Beatriz Alma Hatta visitarán este venres o Departamento de Tecnoloxía dos Alimentos do Campus de Lugo e a Aula de Produtos Lácteos.