Comezan as IV Xornadas de Orientación e Emprego na Escola de Relacións Laborais de Lugo

A Escola Universitaria de Relacións Laborais de Lugo acolle a IV edición das Xornadas de Orientación Laboral e Emprego que organiza conxuntamente coa Vicerreitoría de Coordinación do Campus. O curso, de asistencia gratuíta, desenvolverase os días 27 e 28 no Salón de Graos da Escola.
Para este martes, día 27, está prevista ás 10:30 horas a participación da profesora Covadonga López, da Rede EURES, que disertará sobre a mobilidade dos traballadores por Europa, e do responsable do Centro de Linguas Modernas do Campus de Lugo, Manuel Fernández, quen falará ás 12:00 horas da importancia das linguas á hora de atopar emprego. Este mesmo día pola tarde as charlas versarán sobre as diferenzas entre o emprego na Administración Pública e na empresa privada.
Na xornada do mércores as achegas dos expertos centraranse en temas como os estudos máster, o exercicio libre da profesión, o futuro das titulacións ou como realizar unha busca activa de emprego.