“Os datos son un activo capital para as empresas e un nicho de oportunidades no ámbito das enxeñarías”, di Laura Ríos

“Os datos son un activo capital para as empresas e constitúen tamén un novo nicho de oportunidades no ámbito das enxeñarías”, salienta a líder de machine learning do equipo de analytics dunha das principais multinacionais do sector retail con sede en Galicia, Laura Ríos Pena, para logo precisar que o departamento de traballo que dirixe triplicou o número de traballadores nos últimos anos e seguirá a aumentar o cadro de persoal, dixo.   

A colaboradora do grupo de investigación Proxectos e Planificación (PROePLA) da Escola Politécnica Superior de Enxeñaría do Campus Terra da USC, o centro universitario no que previamente completou as titulacións de Enxeñería Técnica Forestal e Enxeñería de Montes e onde logo desenvolveu conxuntamente coa Estación Biolóxica de Doñana do CSIC a súa tese de doutoramento ao abeiro do programa de Enxeñaría para o Desenvolvemento Rural, fixo estas declaracións no marco dun relatorio incluído na programación do mestrado en Dirección de Proxectos e dirixido a estudantes e investigadores da EPS de Enxeñaría.

Na súa intervención, desenvolvida baixo o título ‘A transformación na era dixital. Estratexia e tendencia de futuro’, Ríos Pena, puxo o foco na importancia crecente que teñen os datos nas empresas, especialmente naquelas que acadan dimensión internacional e que manexan no seu negocio multitude de produtos e servizos con miles de provedores, decenas de miles de empregados e miles de centros de distribución e venda.

A líder de machine learning do equipo de analytics desta empresa do sector retail debullou logo como se integra a xestión de datos en todos os ciclos de vida dos proxectos que desenvolven as multinacionais, uns procesos que cualificou de “moi interesantes” para os futuros directores de proxectos e mesmo para os graduados en Robótica.

A investigación é outro dos piares sobre os que se asenta a dixitalización, no que atinxe á xestión de datos, engadiu Ríos Pena, antes de precisar que a execución de determinados procesos ou proxectos require do desenvolvemento previo das ferramentas necesarias para acadar os obxectivos previstos. Neste contexto, presentou ante o numeroso público presente tres exemplos de proxectos que está a desenvolver en ámbitos laborais diferentes como o son os recursos humanos, sustentabilidade ou a loxística e que, en todos os casos, reportan importantes vantaxes operativas e un sensible aforro de custes para a empresa.