A Deputación cede á USC os terreos para acometer o traslado da Facultade de Formación do Profesorado ao campus
O reitor da USC, Antonio López, e o presidente da Deputación Provincial de Lugo, José Tomé, asinaron este martes o convenio en virtude do que o ente provincial formaliza a cesión de uso á institución académica duns terreos adxacentes á Avenida de Madrid, que contan cunha superficie de 7.500 metros cadrados, nos que se acometerán as infraestruturas precisas para acometer o traslado da actual sede da Facultade de Formación do Profesorado ao campus universitario de Lugo.
“A formalización deste acordo abre un novo ciclo para o futuro do Campus de Lugo e para a súa configuración”, subliñou José Tomé, no marco dun acto ao que tamén asistiron o vicerreitor de Organización Académica e Campus de Lugo, Francisco Fraga, e os deputados provinciais, Pilar García Porto e Pablo Rivera Capón.
“A de Lugo é a Deputación Provincial de toda España que máis colabora cunha universidade pública”, salientou José Tomé, para, de seguido, lembrar a posta en marcha da Granxa Experimental de Castro, a implicación en diversos programas Life, así como outras liñas de financiamento orientadas a favorecer a formación, a promoción cultural e a I+D no Campus de Lugo, como outros ámbitos da estreita colaboración que mantén o organismo provincial coa USC. “Investir en educación é invertir en futuro”, sentenciou o presidente da Deputación Provincial de Lugo, ao tempo que engadiu que “este tipo de actuacións redundan tamén no desenvolvemento económico e social da cidade e da provincia, ao tempo que contribúe a mellorar a calidade de vida das persoas”.
O reitor da USC manifestou a súa gratitude á Deputación Provincial de Lugo pola cesión gratuíta dos terreos nos que se levantará un novo complexo multifuncional para usos docentes e deportivos que permitirá cubrir as necesidades que actualmente presenta a sede da Facultade de Formación do Profesorado situada ao pé da Avenida Ramón Ferreiro.
Este novo convenio dá conta do bo e frutífero entendemento institucional entre a USC e a Deputación de Lugo, dixo Antonio López, para sinalar logo que “podería dicirse que Lugo non tería Universidade de non ser polo decidido apoio da Deputación”. Esta colaboración remonta a súas orixes a comezos do século XX, cando o Consello de Goberno da USC acordou o traslado da Facultade de Veterinaria á capital luguesa, “unha decisión na que tamén influíu o compromiso manifestado pola Deputación Provincial de Lugo para a posta en marcha deste centro universitario, cuxa primitiva sede estaba en Santiago”, explicou.
“Á Facultade de Veterinaria seguíronlle no tempo outros proxectos de gran impacto para a configuración da actual sede universitaria luguesa, tal e como foi a creación do primitivo Colexio Universitario, a transformación da escola de Comercio e despois de Estudos Empresariais na actual Facultade de Administración e Dirección de Empresas, a posta a disposición de terreos para facer a Escola Politécnica Superior de Enxeñaría, o Centro de Innovación, Transferencia e Tecnoloxía (CITT), a Aula de Produtos Lácteos e Tecnoloxías Alimentarias (APLTA)... A estas axudas, cómpre sumar tamén a importantes achegas financeiras”, dixo o reitor da USC.
A disposición dos terreos cedidos pola Deputación permite á USC avanzar cara a dar solucións ás deficiencias advertidas no actual emprazamento da Facultade de Formación do Profesorado de Lugo, “un dos centros que achega máis alumnado ao Campus”, dixo.
