Formación do Profesorado súmase á campaña ‘Ilumina de azul’ para facer visible e sensibilizar sobre o autismo
A Facultade de Formación do Profesorado do Campus de Lugo da USC súmase, xunto co CEIP Anexa, á campaña ‘Ilumina de azul’, unha iniciativa que cada 2 de abril, co gallo do Día Mundial do Autismo, recobre de luz azul edificios e monumentos emblemáticos de todo o mundo como mostra de apoio e solidariedade coas persoas con trastorno de espectro autista (TEA) e coas súas familias. Con motivo desta acción, un lazo de azul sobre o lema ‘Chamémolo polo seu nome’ presidiu a fachada do centro universitario lugués durante a pasada fin de semana.
O obxecto desta campaña, explica a decana da Facultade de Formación do Profesorado, pasa por xerar un maior coñecemento sobre o autismo, ademais de concienciar sobre aspectos básicos que contribúan a promover a participación, a igualdade de oportunidades e a integración social das persoas con autismo e das súas familias. Daquela, esta acción pretende axudar a entender a variabilidade dentro do espectro do autismo: Iguais, pero diferentes; traballar por valorar a singularidade e a especificidade das persoas con autismo e supera estigmas e falsas crenzas, e potenciar o sentido de pertenza fronte ao rexeitamento.
O Trastorno do Espectro Autista (TEA) é un trastorno do desenvolvemento neurolóxico que se caracteriza por presentar alteracións na comunicación e a interacción social, ademais dun patrón de comportamentos, intereses ou actividades restrinxidos e repetitivos. O primeiro deles maniféstase basicamente pola presenza de déficits tanto de natureza comunicativa como social, que se expresan a través de déficits na reciprocidade socio-emocional, déficits nos comportamentos comunicativos non verbais da interacción social e déficits no desenvolvemento, mantemento e comprensión das relacións.
Os patróns de comportamento obsérvanse principalmente na presenza de movementos motores estereotipados ou repetitivos, insistencia á monotonía, rutinas e patróns ritualizados, intereses restrinxidos e obsesivos e hiper ou hiposensibilidade sensorial. O TEA é un trastorno heteroxéneo que se presenta en diferentes niveis de gravidade e adoita afectar a cada individuo de maneira diferente, aspecto clave para o desenvolvemento das estratexias de intervención psico-educativa. Isto fai que, na actualidade, o autismo se describa como unha síndrome complexa, con múltiples causas e diversas manifestacións.