Características e principios
- Voluntaria: as persoas acoden libremente a mediación e poden, en consecuencia, abandonar o proceso cando así o desexen, isto sen prexuízo de acudir á vía xudicial.
- Confidencial: a información obtida en mediación non pode ser empregada como medio de proba en xuízos posteriores, respectándose en todo momento o segredo profesional.
- Imparcial e neutral: a persoa mediadora debe axudar e atender de maneira equilibrada ás necesidades de todas as partes implicadas na disputa, coidándose de introducir no procedemento as súas propias crenzas e valores.
- Flexible: adáptase, en todo momento, ás características e necesidades das persoas implicadas no procedemento.
Vantaxes
- É un procedemento áxil, flexíbel e eficaz.
- Supón un menor custo económico e un aforro de tempo con respecto ao proceso xudicial.
- Mantén a confidencialidade das manifestacións das partes e evita a publicidade do conflito.
- Permite ás partes “deseñar” solucións ao seu conflito máis creativas que as axustadas a parámetros unicamente xurídicos.
- Posibilita que as partes incrementen o seu poder de decisión con respecto aos acordos que deben ser alcanzados.
- Mellora a garantía de cumprimento dos acordos, xa que foron alcanzados voluntariamente polas partes e satisfán, por isto, plenamente os seus intereses.
- Procura preservar e mellorar as relacións futuras entre as partes.
Como actúa a persoa mediadora
A persoa mediadora é un ou unha profesional con formación específica en técnicas de comunicación e xestión de conflitos, que non xulga, non impón os seus propios valores ás partes, nin toma partido por ningunha delas, garantindo a igualdade, o equilibrio e o respecto entre as e os participantes na mediación.