A exposición ‘Gaza: o eco dos esquecidos’ suma máis de 1.600 visitas nas súas dúas primeiras semanas na Igrexa da Universidade

A exposición Gaza: o eco dos esquecidos da Fundación Araguaney-Puente de Culturas e a Universidade de Santiago (USC), actividade enmarcada na Cátedra USC-Araguaney para o Diálogo entre Culturas, contabiliza xa nas súas dúas primeiras semanas máis de 1.600 visitas. A mostra contempla tamén a posibilidade de realizar visitas guiadas cos comisarios Cibrán Meléndez e Estela Pintos, como a que ten lugar este luns para 60 estudantes de Xornalismo da materia de Fotoxornalismo, iniciativa da profesora da USC María Soliña Barreiro.

A exposición permite ao visitante sentir de primeira man a realidade de Gaza a través da mirada de tres reporteiros gráficos gazatís, Mohammed Zaanoun, Ahmed Zakot e Abood Abu Salama, que viven este horror desde dentro, achegando a mirada cruel e salvaxe dos actos acometidos polo exército israelí en terras palestinas ante a pasividade do mundo exterior. Tamén a exposición amosa aos “esquecidos”, ás vítimas que se viron involucradas no conflito, pero que non aparecen nas noticias a pesar de ser relevantes.

A mostra estrutúrase seguindo os diferentes aspectos que mostran a complexidade do xenocidio desde as perspectivas descritas polos tres fotoxornalistas palestinos e desde distintas ópticas: histórica, atemporal, xornalística, fotográfica, informativa e audiovisual, o que permitirá ao visitante obter unha “visión integral, poliédrica e multidisciplinar” do conflito.

O público poderá contemplar 26 fotografías, o documental Hospital Al Shifa: os crimes soterrados cedido pola televisión Al Jazeera, vídeo-testemuños dos reporteiros gráficos e unha creación artística ata o 31 de marzo, en horario de 11:00 a 14:00 horas e de 17:00 a 20:00 horas.

Coñecendo aos fotoxornalistas
Mohammed Zaanoun é un fotoxornalista e documentalista palestino que actualmente goza dunha bolsa en Ámsterdam, concedida polo NIAS (Instituto Holandés de Estudos Avanzados en Humanidades e Ciencias Sociais). Leva moitos anos documentando os horrores de Gaza. A pesar de que el e a súa familia foron desprazados, enfrontándose a bombardeos e a un asedio total, segue comprometido en documentar o xenocidio para que o mundo vexa o que está ocorrendo e para que se actúe en consecuencia. O pasado ano recibiu o Premio ao Xornalista máis resiliente nos  Premios Free Press 2024.

Ahmed Zakot é natural da cidade de Gaza. Comezou a traballar coa axencia de noticias Reuters como fotógrafo, de 2002 a 2020. Posteriormente, continuou a súa carreira como fotógrafo freelance para varios xornais e axencias internacionais. Así mesmo, cubriu as catro guerras na Franxa de Gaza así como a vida cotiá na Franxa e a ola de divisións e disputas internas que se produciron entre as dúas maiores faccións palestinas e os acontecementos golpistas que tiveron lugar en 2006. Actualmente traballa como camarógrafo independente para moitas ONG, realizando a coordinación e cobertura das súas actividades e proxectos.

Abdulrahman Abu Salama, tamén coñecido como Abood Abu Salama, é un xornalista e fotógrafo palestino da cidade de Gaza, nacido en abril de 1997, que vive actualmente no campo de refuxiados de Jabalia, no norte da Franxa.