O obradoiro ‘Construíndo un círculo de coidados. Pedagoxía queer dos afectos’ abre a inscrición do 26 de febreiro ao 3 de marzo
Estimular un desenvolvemento integral feminista e queer é un dos obxectivos do obradoiro ‘Construíndo un círculo de coidados. Pedagoxía queer dos afectos’ que abre o seu prazo de inscrición en liña do 26 de febreiro ata o 3 de marzo nos campus de Lugo e Santiago de Compostela. Esta acción formativa configúrase como un obradoiro-círculo dirixido ao estudantado universitario, que se desenvolverá en dous formatos diferenciados, con dous grupos distintos, un presencial e outro virtual.
A través da reflexión compartida, buscarase o desenvolvemento das competencias afectivas das persoas participantes dende unha perspectiva feminista e queer. Ao longo de seis sesións —seis para cada espazo— levaranse a cabo actividades e dinámicas moi diversas: expresión verbal e artística, xogo grupal, análise de obxectos culturais, ou debates, entre outros e sempre adaptándose ás características, necesidades e intereses do estudantado e en consonancia cos obxectivos da formación.
O grupo presencial reunirase os días 5, 12, 19 e 26 de marzo, 2 e 9 de abril de 2025, en horario de 12.30 a 15.00 horas na Aula 4 do Módulo A da Facultade de Ciencias da Educación do Campus Sur de Santiago de Compostela; mentres que o grupo virtual correspondente ao Campus de Lugo reunirase os días 6, 10, 17, 24, 31 de marzo e 7 de abril de 2025, en horario de 11.00 a 13.30 horas a través da ferramenta MS Teams. Para cada un dos dous grupos ofértanse 15 prazas cuxa inscrición pode formalizarse de balde.
Contidos
A identidade como subxectividade no plano persoal e no social; o descubrimento, identificación, comprensión e regulación dos afectos; as disidencias sexuais e vinculares; así como os vínculos saudables no relativo á constitución das relacións interpersoais dende a sensibilidade e a horizontalidade serán os contidos abordados no obradoiro. Aixa Permuy, profesora e investigadora da Universidade de Santiago de Compostela e membro do CIFEX será a responsable de impartir esta actividade a través dunha metodoloxía de carácter grupal, activa, dinámica e participativa.
As sesións basearanse en explicacións, simulacións, dinámicas de grupo, discusións e debates. Fomentarase a análise da linguaxe empregada, dos estereotipos interiorizados, das mensaxes recibidas a través dos medios de comunicación, dos obxectos culturais e da sociocultura en xeral, “a fin de valorar o influxo de todos estes elementos na construción das actitudes, pensamentos, afectos e comportamentos individuais e colectivos”, explican dende a Oficina de Igualdade de Xénero da USC. Paralelamente ás sesións, de forma autónoma e nas horas non presencias establecidas para esta formación, o estudantado realizará un traballo sobre os contidos tratados.
