Proxector supera os 2.000 vídeos compilados e catalogados

‘Proxector: audiovisuais en galego para a docencia’ é un espazo web dedicado a compilar, clasificar e difundir recursos audiovisuais que sirvan de apoio á docencia en lingua galega de diversas materias de bacharelato e de ensino universitario. Esta iniciativa, froito da sinerxía entre o Servizo de Normalización Lingüística da USC e o Centro de Documentación Sociolingüística de Galicia do Consello da Cultura Galega (CCG), acaba de superar os 2.000 vídeos compilados e catalogados. 

O proxecto orixinal foi deseñado no seo da USC e botou a andar no ano 2015 no portal educativo Didactalia. En 2018, o CCG súmase á iniciativa e comeza a participar de xeito activo tanto na súa coordinación como na edición de contidos. Os vídeos están clasificados segundo a súa temática, o idioma no que foron gravados ou subtitulados, e o nivel de ensino no que se considera que poden ser empregados. A maiores, o web ofrece unha ficha descritiva coa información básica de cada recurso. 

“Podes acceder aos contidos a través da busca libre e/ou os diferentes despregables que che permitirán filtrar os resultados segundo os criterios de clasificación antes citados”, explican os impulsores da iniciativa. Proxector é un catálogo aberto e en continua actualización, por iso, fan un chamamento a todas aquelas persoas que, de coñecer algún recurso audiovisual que aínda non estea incluído, o recomende enviando a información a servizo.normalizacion [at] usc.gal (servizo[dot]normalizacion[at]usc[dot]gal) 

O traballo de actualización e xeración de novo contido en Proxector desenvólvese en dúas liñas. Por un lado, a incorporación case continua de novos recursos audiovisuais. E polo outro, a elaboración de Especiais, compilacións temáticas que aproveitan algunha efeméride ou acontecemento de relevancia científica como por exemplo, ‘Arqueoloxía, un bo plan para coñecer Galicia este verán’, o último monográfico publicado.