O persoal investigador do Instituto de Estudos e Desenvolvemento de Galicia (IDEGA) e do Instituto de Humanidades (iHUS) terán a oportunidade de compartir experiencias coa Axencia Galega de Innovación da Xunta de Galicia nun encontro que terá lugar o venres 4 no centro de Estudos Avanzados (Finca Vista Alegre).
A xornada inauguraraa ás 9.30 horas a vicerreitora de Política Científica, Pilar Bermejo Barrera, e logo dela intervirán os directores do IDEGA e do iHUS, Rubén Lois e Laura Lojo, respectivamente, así como a directora da área de Talento e Transferencia da GAIN, Mª José Mariño Fontenla, que darán paso a un debate co persoal investigador.
A sesión contempla ademais a presentación dunha serie de experiencias por parte do persoal científico dos dous institutos de investigación da USC Valerià Paül Carril, Jacob Copeman, Pedro Manuel López Barja de Quiroga, Jackiline Brígida Salazar Torres, Xosé Manoel Núñez Seixas e Maricarmen Tapia Gómez e Ángel Miramontes Carballada.
Para as 12.50 horas está prevista a presentación de conclusións e unha visita guiada á Facultade de Ciencias da Comunicación para coñecer Virtus, a plataforma tecnolóxica para a investigación virtual da USC.