O Salón de Actos da Facultade de Filosofía da USC acolle este mércores 26 de novembro, ás 18.00 horas, unha nova sesión do Ciclo de Cine Filosófico. Desta volta iníciase un miniciclo polo 50 aniversario da morte de Franco coa proxección do filme Canciones para después de una guerra (1976), de Basilio Martín Patino.
Esta obra rodouse bastante antes da súa estrea en 1976. A película consiste nunha serie de imaxes de arquivo, todas elas previamente aprobadas pola censura, sobre as que se superpoñen cancións populares da época. Ademais dos himnos propios da trincheira, Martín Patino utiliza temas e coplas moi famosos co fin de dar un segundo significado ás imaxes, a miúdo crítico ou satírico. Mediante a montaxe, o director fai unha crítica irónica á propaganda do réxime.
Basilio Martín Patino (1930-2017) foi un dos directores de cine clave na España dos anos 60 e 70. Autor de filmes como Nueve cartas a Berta (1965), Queridísimos verdugos (1977) ou Los paraísos perdidos (1985), o seu último filme foi un documental sobre o movemento 15-M. Dentro da súa militancia anarcosindicalista, participou na Fundación Cultural da Confederación Nacional do Traballo (CNT). O seu interese pola cinematografía de non ficción levouno a explorar os territorios do falso documental, como o dedicado á matanza de campesiños libertarios en Casas Vellas. Destaca tamén o seu interese polas tecnoloxías audiovisuais, tanto as pioneiras como as novas, o que o levou a investigar as posibilidades do vídeo desde a súa aparición, así como os recursos da imaxe en 3D. En 2007 recibiu o título de doutor honoris causa pola Universidade de Salamanca. O filme Canciones para después de una guerra "é unha obra mestra que desenmascara o relato oficial da ditadura, mostrando o sufrimento e a esperanza dun país nunha época de gran adversidade", explican dende a organización do evento.
