Salón Reitoral
O Consello de Goberno da Universidade de Santiago reúnese o mércores 23 de xullo nunha sesión ordinaria que dará comezo ás 9.30 horas no Salón Reitoral do Colexio de San Xerome para tratar, entre outros asuntos, a aprobación dos Regulamentos do Servizo Universitario de Residencias e de Mobilidade, ademais da creación do Instituto de Investigación en Saúde Global e Desenvolvemento Sostible - iTERRA e do seu regulamento de réxime interno.
O protocolo de protección das persoas menores de idade en actividades deportivas, de lecer e outras organizadas pola institución, do acordo sobre o recoñecemento de competencias dixitais docentes en títulos da USC, do cambio de nome da Cátedra institucional de Intelixencia Artificial en Ciencias da Saúde e da proposta de incorporación da Universitat de Barcelona (UB) a SIGMA GESTIÓN UNIVERSITARIA A.I.E. (M.P.) serán outros asuntos que se someterán a debate, ao igual ca os termos do Concerto entre a USC e o Sergas para a utilización das institucións sanitarias na investigación e docencia universitaria.
En materia académica e administrativa tratarase a convocatoria anual de tramitación de titulacións do curso 2025-2026, o regulamento de réxime interno da Facultade de Ciencias da Educación e de TFG do Grao en Xestión de Empresas Hostaleiras da USC. Xa no referido a persoal, someterase a aprobación un cambio de adscrición de profesorado a área de coñecemento así como a modificación das RPT de PTXAS laboral e funcionario.
Completan a orde do día, entre outros asuntos, as memorias de Institutos e Centros Singulares de Investigación, de Plataformas Científico-Tecnolóxicas e de estudos propios.