Máis de 300 aspirantes para acceder ao programa de estímulo do talento matemático Estalmat 2014
Un total de 314 estudantes de toda Galicia participan este sábado 7 nas probas de selección para participar no programa Estalmat-Galicia de estímulo do talento matemático. Como en anteriores edicións, entre eles seleccionarase a 25 rapaces e rapazas nacidos en 2001 e 2002 para formar parte da 8ª promoción deste programa. Participan na selección 193 rapaces e 121 rapazas de 225 centros escolares das catro provincias galegas. Así, están rexistrados nas probas 160 alumnos da Coruña e 107 Pontevedra, outros 29 de Lugo e 18 de Ourense que cursan estudos en 125 centros de ensino público e 48 privados. Con esta edición do programa xa se levan seleccionados 200 estudantes entre 2.000 alumnos/as de 12 ou 13 anos dende que comezou a desenvolverse esta iniciativa. A proba comezará ás 9.45 horas deste sábado 7 na Facultade de Matemáticas e nela os rapaces e rapazas citados terán que resolver unha serie de problemas, para o que dispoñen dun tempo de dúas horas e 30 minutos. Ao remate realizarán a tradicional foto de grupo nas escaleiras da facultade aberta aos medios de comunicación. Os pais e familiares que acoden cos aspirantes recibirán unha charla informativa na que se lles explicará en qué consiste o proxecto Estalmat-Galicia. Será o catedrático de Matemática Aplicada e novo reitor da USC Juan Viaño, que dirixe o programa dende hai anos quen se encargará de transmitirlle aos pais e nais a importancia desta iniciativa. Un equipo de doce profesores encargaranse da avaliación das probas, que son anónimas, facendo unha dobre corrección independente de cada problema para que finalmente un comité conxunto decida os 50 preseleccionados. A lista farase pública na web do proxecto (www.estalmatgalicia.com) entre o 9 e o 13 de xuño e serán convocados xunto cos seus pais/nais/titores para realizar unha entrevista persoal na que deberán comprometerse a participar no programa, asistindo as actividades marcadas pola organización. Debido ao elevado número de participantes, a organización fai un chamamento aos familiares para que sexan responsables nos seus desprazamentos para facilitar a chegada ata a facultade e non colapsar os accesos ás probas. Os seleccionados participarán no programa de estímulo do talento matemático que inclúe 20 sesións de tres horas nas mañás dos sábados (dous cursos académicos), coa posibilidade de continuar outras 12 sesións repartidas noutro ano máis, polo que se fai necesario o compromiso firme dos familiares e alumnos/as. Todas as actividades son na Facultade de matemáticas e son impartidas por un equipo docente de 42 profesores de matemáticas do ensino medio e das universidades galegas. O obxectivo de Estalmat é detectar e prestar atención a nenos e nenas con talento que, en moitos casos, poden pasar inadvertidos ou quedar desatendidos nas esferas normais do ensino e da familia, desenvolvendo aspectos que permitan axudar a pensar en matemáticas, resolver problemas e, en definitiva, gozar desta ciencia ao tempo que se detecta e canaliza o talento matemático para mellor proveito da sociedade. ESTALMAT-Galicia O Proxecto ESTALMAT-Galicia para a detección e estímulo do talento en matemáticas no ámbito da Comunidade Autónoma de Galicia forma parte do Proxecto ESTALMAT-España, implantado en varias comunidades autónomas. Conta co aval científico e económico da Real Academia Española de Ciencias Exactas, Físicas e Naturais; da Consellaría de Cultura, Educación e Ordenación Universitaria, do Consejo Superior de Investigacións Científicas (CSIC), das deputacións da Coruña e Lugo e do Concello de Guitiriz, ademais da infraestrutura e apoio xeral achegados pola Universidade de Santiago de Compostela, dun xeito especial pola Facultade de Matemáticas. Para acadar mais información sobre o proxecto, as persoas interesadas poden dirixirse á web http://www.estalmatgalicia.com.