85 estudantes de 27 países achéganse á USC para aprender galego

Un total de 85 estudantes chegados de todos os recunchos do mundo están dende comezos de mes en Santiago para asistir á XXIII edición dos Cursos de verán de Lingua e cultura galegas que organizan o Instituto de Lingua Galega (Ilg) da USC, a Secretaría Xeral de Política Lingüística da Xunta de Galicia e a Real Academia Galega. A inauguración dos cursos tivo lugar este xoves na Facultade de Filosofía nun acto no que participaron o reitor da USC, Juan Casares; o presidente da Real Academia Galega, Xosé Luís Méndez Ferrín; o secretario xeral de Política Lingüística, Rosario Álvarez; a directora do Ilg, Rosario Álvarez; e o director dos cursos, Francisco Fernández Rei. Nesta edición de 2010, que se prolongará ata o 30 de xullo, participan 85 estudantes procedentes de Alemaña, Arxentina, Brasil, Reino Unido, República Checa, Chile, Costa Rica, Croacia, Cuba, España, Estados Unidos, Finlandia, Francia, Grecia, Hungría, Indonesia, Irlanda, Italia, Marrocos, México, Perú, Polonia, Portugal, Romanía, Rusia, Ucraína e Xapón, que se sumarán aos máis de 2.200 alumnos e alumnas de moi diversos países de todo o mundo que xa participaron nas vinte e dúas edicións pasadas. O alumnado deste ano repártese en catro grupos -dous elementais, un grao medio e o Curso Superior de Filoloxía Galega- con clases impartidas por once docentes dos Seminarios da Real Academia Galega, do Instituto da Lingua Galega e da Facultade de Filoloxía da USC. Ao longo deste mes desenvolveranse dez conferencias a cargo dos escritores Manuel Rivas e Yolanda Castaño e de persoas de recoñecido prestixio en distintos aspectos da realidade sociocultural de Galicia (literatura, sociolingüística, historia, xornalismo, música, psiquiatría...) como Xosé Ramón Barreiro Fernández, María Yáñez, Xesús Alonso Montero, Henrique Monteagudo, Xosé Luís Axeitos, Xosé Manuel Salgado, Uxía Senlle e María Dolores Domínguez. Coas conferencias alternaranse proxeccións de documentaise películas en lingua galega, que nuns casos terán relación coa conferencia do día seguinte e noutros tratarán aspectos socioculturais non tratados nelas. As actividades académicas complétanse con excursións os sábados a diferentes puntos da xeografía galega como as terras de Betanzos e Pontedeume e a comarca do Baixo Miño. De esquerda a dereita, Rosario Álvarez, Rosario Álvarez, Juan Casares, Xosé Luís Méndez e Francisco Fernández