Abren as pistas de tenis 3 e 4 do Campus de Compostela

As pistas de tenis 3 e 4 do Campus de Santiago atópanse dende esta semana de novo operativas, logo de rematadas as obras de remodelación que tiveron lugar durante o pasado mes de decembro. Estas instalacións son as únicas no seu xénero de libre acceso a toda a comunidade universitaria e á cidadanía tanto na Escola de Tenis, como no Club e para a práctica non regulada.
As melloras acometidas nas pistas que xestiona a Vicerreitoría de Cultura consistiron na elevación do piso en 9 centímetros mediante a aplicación dunha capa de conglomerado e outra de TenisKuic, para permitir así unha mellor práctica deste deporte nas instalacións da USC.
Os interesados poden obter desde este momento os cartóns de usuario cos novos prezos axeitados proporcionalmente ao tempo dispoñible ata finais do mes de setembro. Para mais información poden chamar ao teléfono 981 563100, extensión 15073 pola mañá e 42439 pola tarde, ou consultar na páxina web do Servizo de Deportes.