Alumnado da ETSE proclámase vencedor no programa de talento Tech Challenge

O equipo da USC ‘Overflow’ integrado por alumnado de Enxeñaría Informática da USC proclamouse vencedor do Tech Challenge, un desafío integrado por tres fases: retos, conflito e Hackaton. Alejandro González Santos, Juan Pablo García Amboage e Pedro Henrique Nobre Oliveira, todos eles alumnos da Escola Técnica Superior de Enxeñaría, xunto con José Víctor Carou Padín da UDC, compoñen o equipo vencedor.

O alumnado da USC tivo que superar unha primeira fase orientada ao desenvolvemento de software, algoritmia e lóxica co que obter as chaves á cidade do futuro Anthem. A continuación, xa no marco da segunda fase, os estudantes deberon resolver un conflito da cidade a través de habilidades técnicas. A fase derradeira ou Hackaton consistiu en que os cinco equipos finalistas pasaran 48 horas nas instalacións da empresa organizadora do evento para demostrar as súas habilidades e ser quen de entrar no seu cadro de persoal.

O Tech Challenge é un programa de talento para animar a estudiantes a enfrontarse a unha serie de retos tecnolóxicos ao largo de varios meses (novembro 2021 – abril 2022), podendo optar a diversos premios e incluso a un programa de bolsas para traballar no grupo Hewlett Packard Enterprise. Deste xeito, centros de estudantes, organizados en equipos, puideron coñecer os segredos dunha cidade do futuro chamada Anthem, que protagoniza unha das campañas actuais de HPE, “e sairán dela sabendo utilizar a tecnoloxía para crear un mundo mellor”, explican dende a organización do evento.