Ampla representación da USC nos Campionatos de España Universitarios
Karate, fútbol sala masculino, tenis, xadrez, esgrima, loita, atletismo e hípica serán as disciplinas deportivas nas que a USC terá representación no marco dos Campionatos de España Universitarios que se van desenvolver ata o vindeiro 23 de abril. “Queremos fomentar o deporte de alta competición dentro da estratexia de deporte para toda a comunidade universitaria, alén de facilitar a compatibilidade entre o alto nivel e a vida académica”, explicou o delegado do reitor para o Deporte, Javier Rico, en relación á participación da institución compostelá nas diferentes competicións. Javier Rico tamén subliñou que no presente curso déuselle “un gran pulo” á participación do estudantado nestes campionatos estatais xa que o deporte constitúe un elemento transversal que debe acompañar o estudantado no desenvolvemento da súa vida universitaria.
Deste xeito, dende este venres 14 e ata o sábado 15, en Huesca, desenvolverase o Campionato de España Universitario de Karate. Valladolid acollerá, pola súa parte, as competicións de fútbol sala masculino e tenis do 17 ao 20 de abril. O xadrez centrará a axenda deportiva en Salamanca do 19 ao 22 deste mes, mentres que do 19 ao 21 será a quenda do Esgrima na cidade de Burgos. Nos Alcáceres, en Murcia, desenvolverase o Campionato de España Universitario de Loita, entre o 20 e o 21 de abril. En León terá lugar a competición de atletismo do 21 ao 23 de abril, mentres que a hípica será protagonista do 21 ao 23 do mesmo mes en Segovia. Estas son as datas máis inmediatas pero está previsto que a USC tome parte noutras seis competicións que se estenderán ata o vindeiro 13 de maio. Ademais, no caso do fútbol sala, o equipo proclamouse con anterioridade vencedor nos Campionatos Galegos Universitarios de Deportes Colectivos.
A USC xa acadou dous ouros nos Campionatos de España Universitarios o pasado mes cando o estudante da Facultade de Medicina e Odontoloxía, Tomás Fernández, e a alumna de Psicoloxía, Irene Montemuíño, lograron proclamarse vencedores en Taekwondo, nos campionatos celebrados en Burgos. Fernández logrou o ouro na modalidade de poomsaes, mentres que Montemuíño acadouno na categoría feminina -62 kg.
