Ana Gude cre que en Dereito a investigación “debe seguir sendo un motor fundamental na nosa actividade”
“Os nosos retos máis inmediatos para os próximos anos, como non podería ser doutro xeito, céntranse no ámbito da docencia e investigación, dous conceptos que se han concibir indisolublemente unidos”. Con esta declaración de intencións iniciou a profesora Ana María Gude Fernández o seu discurso no acto de toma de posesión como decana da Facultade de Dereito, tras ser reelixida para o cargo en novembro. A investigación, asegurou “debe seguir sendo un motor fundamental na nosa actividade porque xera coñecemento, e ese coñecemento proxectámolo cara a dentro, cara aos nosos estudantes como docentes, e cara a fóra, cara á sociedade a través da transferencia do coñecemento”. Nun acto presidido polo reitor da USC Antonio López e ao que tamén asistiu a secretaria xeral da USC Dulce María García Mella, a decana asegurou que defenderá “os intereses do centro con responsabilidade, humildade, compromiso, valentía e rigor e que poñerei todo o meu esforzo niso”.
Na súa intervención, o reitor Antonio López coincidiu na prioridade dos retos formulados pola decana por consideralos globais do conxunto da Universidade. Neste senso, sinalou a necesidade de garantir o axeitado relevo xeracional do cadro docente universitario e subliñou que é preciso incentivar a carreira universitaria asociada á existencia de oportunidades reais para desenvolvela logo do período de doutoramento. Tamén lembrou que o centro traballa na revisión do plan de estudos do grao, un proceso “sempre necesario”, xa que é a forma de atender de maneira axeitada as necesidades da sociedade e as novas demandas, para así achegar solucións axustadas a través da formación regrada e a continua.
Así mesmo, puxo especial atención á transferencia de coñecemento ao servizo da sociedade. As Ciencias Sociais, e particularmente o Dereito, teñen múltiples capacidades a disposición do sector público e privado e por extensión ao servizo da sociedade porque logo da aposta pola investigación esta “ten a posibilidade de mellorar as condicións de vida da sociedade” a través da transferencia do coñecemento. Rematou a súa intervención lembrando a figura de Luisa Cuesta Gutiérrez, que se converteu hai cen anos na primeira muller docente da USC tras ser nomeada en 1924 profesora auxiliar.
A decana manifestou o seu desexo de “traballar para erradicar definitivamente a idea de que o que se ensina ou investiga na Universidade está afastado ou desvinculado do que necesita a sociedade”. Ademais, considerou que “a Facultade de Dereito da USC debe seguir posicionada nos primeiros postos entre as mellores de España. É o momento de reflexionar como se pode ampliar a nosa oferta de graos e posgraos para seguir sendo un centro de referencia ao que os estudantes queren vir formarse e continuar o seu desenvolvemento instrutivo. Analizar con calma se o que ofertamos é atractivo, razoable e, sobre todo, demandado pola sociedade”.
Tamén indicou que “internacionalizar a Facultade de Dereito debe ser outra prioridade e con esa finalidade levaremos a cabo unha estratexia que implique todos os estamentos e sectores do noso Centro e que incentive a creación de vínculos con outras facultades e universidades de prestixio”.
O equipo decanal de Ana María Gude Fernández complétano Natalia Pérez, Vicente Antonio Sanjurjo e Francisco Javier Framiñán Santas.
Traxectoria
Ana Gude Fernández é profesora titular de Dereito constitucional da USC. Tivo responsabilidades en tarefas de xestión na Facultade de Dereito como vicedecana de Organización Académica, secretaria e directora do Departamento de Dereito Público e Teoría do Estado. Imparte docencia das materias Dereito Constitucional. Principios estruturais do Estado, Órganos do Estado Democrático e dereitos constitucionais e liberdades públicas. No campo da investigación, forma parte do grupo de Dereito e Cidadanía co que participou en numerosos proxectos de investigación. Realizou diversas estadías de investigación no Instituto de Dereito público da Universidade de Friburgo (Alemaña). A súa liña de traballo céntrase principalmente no ámbito do dereito parlamentario e os dereitos fundamentais no que é autora de libros e outras publicacións.
