A análise da incidencia dun ben patrimonial como a muralla de Lugo na paisaxe urbana, centra un curso en Humanidades

O estudo, a análise e interpretación dun ben patrimonial tan rico e complexo como é a muralla de Lugo, aínda que moi pouco coñecido, especialmente no que se refire a algúns períodos da súa historia, como a época medieval, moderna ou incluso contemporánea, tanto por parte dos nosos alumnos como dos propios lucenses, en xeral, centra a temática dun curso de verán da USC que se desenvolverá do 22 ao 24 de xuño na Facultade de Humanidades do campus de Lugo. O prazo de matrícula neste seminario formativa incluído na programación da Universidade de Verán 2015 da USC remata o vindeiro 12 de xuño.

Dirixido polos profesores do Departamento de Historia da Arte da USC Juan M. Monterroso Montero e Ana Goy Diz, o curso ‘Entre murallas: paisaxe urbana e cidade’, ofrece unha serie de relatorios e actividades complementarias que, dende unha perspectiva interdisciplinar, afondan na singularidade desta realidade, na procura dun compromiso da sociedade para a conservación do seu Patrimonio.

A vicerreitora de Servizos Universitarios do campus de Lugo da USC, Carme Silva Domínguez, e a decana da Facultade de Humanidades, María Isabel González Rey, serán as encargadas de abrir a quenda de intervencións dun foro no que se abordarán, entre outras cuestións, a estatuaria romano-indíxena da Gallaecia, a cidade de Lugo na época altomedieval ou a pegada franciscana. A catedral de Lugo e as súas capelas, así como o Museo Provincial de Lugo serán outras das cuestións abordadas no marco deste programa de formación estival da USC.