Andrés Osoro, novo presidente da Asociación Sectorial de Estudantes de Enxeñarías Agroforestais
O recoñecemento das titulacións habilitantes no ámbito das enxeñarías fronte aos títulos que carecen de competencias profesionais determinadas e a progresiva orientación práctica e aplicada dos contidos formativos que cursa o alumnado universitario matriculado en enxeñarías agroforestais centran as principais reivindicacións da Asociación Sectorial de Estudantes de Enxeñarías Agroforestais (SEIAF), un colectivo estudantil que dá cabida a todas as escolas de agrícolas e forestais de España e que vén de elixir como novo presidente ao alumno de dobre grao na EPS de Enxeñaría do Campus de Lugo Andrés Osoro Corsino.
A candidatura liderada por este estudante asturiano que cursa Enxeñaría Agrícola e Agroalimentaria e Enxeñaría Forestal e do Medio Natural no Campus Terra da USC aspira a poñer en valor as competencias profesionais e laborais legalmente atribuídas a estas enxeñarías fronte a “outras titulacións con denominacións potencialmente máis atractivas”, a fin de espertar o interese da mocidade preuniversitaria cara a uns itinerarios formativos que están a experimentar unha progresiva perda de alumnado.
O labor de divulgación dos estudos agroforestais, así como da súa pertinencia e das súas competencias profesionais, constitúen, na opinión de Osoro Corsino, un cometido necesario para espertar novas vocacións entre o alumnado de Bacharelato e ensino secundario. A promoción de charla e sesións informativas en institutos e centros educativos de toda España baixo a coordinación dos centros das 14 universidades españolas que nas que se imparten estudos agronómicos e forestais é outra das ideas que baralla a nova directiva da SEIAF para aumentar a matrícula nestes títulos de grao.
Alén da captación de futuros estudantes, a mellora e a constante actualización de coñecementos dos profesionais en formación ou xa titulados constitúe outro dos obxectivos fixados desde a SEIAF, que solicita ás distintas administracións implicadas, así como ás propias universidades, a avanzar cara o deseño e a implantación dunha metodoloxía máis práctica e adaptada á casuística e ás problemáticas reais que presentan os sectores agrario e o forestal.
A elección de Andrés Osoro Corsino como presidente da Asociación Sectorial de Estudantes de Enxeñarías Agroforestais (SEIAF) reforza se cabe a pegada do Campus Terra da USC no contexto dun órgano estudantil estatal no que a presenza de alumnado da EPS de Enxeñaría xa conta cunha dilatada tradición, incluso en cargos de dirección. Aínda así, relata Osoro Corsino, as aspiracións da SEIAF seguen a verse condicionadas por algunhas problemáticas no plano interno, tal e como son a finalización do desenvolvemento dun regulamento interno ou a limitación de recursos económicos cos que financiar obradoiros, charlas ou calquera outro tipo de programa formativo.