O Arquivo Histórico da USC abre os seus espazos ocultos en dúas visitas guiadas privilexiadas
Un ano máis, o Arquivo Histórico da USC (AHUS) súmase aos actos da Semana Internacional dos Arquivos que, baixo o lema (#IAW2025)! #Arquivos Accesibles – Arquivos para tod@s, se desenvolve entre o 9 e o 13 de xuño. Preténdese así destacar a necesidade de superar barreiras sociais, técnicas, físicas, lingüísticas ou culturais para favorecer a súa accesibilidade, de aproveitar as oportunidades que ofrece a tecnoloxía para mellorar o acceso á información e de recoñecer os arquivos como axentes clave na configuración da identidade cultural, da memoria da sociedade, así como da gobernanza e a rendición de contas.
O Arquivo da USC súmase así a esta iniciativa global coa proposta #AHUS_VIP, para favorecer o acceso ás súas instalacións e coñecer, mediante unha experiencia personalizada, todo o traballo que está a realizar para a preservación do patrimonio documental.
Para iso, o propio Día Internacional dos Arquivos, o luns 9 de xuño, de 12.00 a 13.15 h, as primeiras 8 persoas que formalicen a súa inscrición na visita guiada poderán percorrer o edificio, visitar depósitos de acceso vedado ao público e asistir a unha demostración do traballo que realiza a restauradora Cristina Doral Brun no taller de restauración, un dos poucos existentes en Galicia especializados na conservación de documentos en papel e pergameo.
Esta experiencia, para que poida chegar ao maior número de persoas interesadas, repetirase o xoves 12 de xuño no mesmo horario, de 12.00 a 13.15 h. para outras 8 persoas.
