O autor do método EuroCom, o profesor Stegmann, atópase estes días na USC

Co gallo da recente edición galega do método de aprendizaxe EuroComRom – As sete peneiras: Saber ler axiña todas as linguas románicas, a Área de Filoloxía Catalá da USC coa colaboración do Departamento de Filoloxía Galega,organiza por vez primeira en Galicia unhas xornadas de presentación do proxecto plurilingüe de alta relevancia europea EuroCom.
No marco do encontro, estes días atópase na cidade o autor do método, o profesor Tilbert D. Stegmann, da Universidade J.W. Goethe de Frankfurt, que este martes lle explicou aos presentes as peculiaridades do proxecto EuroCom, o acrónimo para Intercomprensión Europea nas tres grandes familias de linguas europeas: as románicas (EuroComRom), eslavas (EuroComSlav) e xermánicas (EuroComGer). Trátase dun método de aprendizaxe simultánea de linguas europeas baseado na facilidade de intercomprensión dentro das tres grandes familias lingüísticas, aproveitando as semellanzas entre os idiomas dun mesmo grupo.
Desenvolvido dende hai xa varios anos polos profesores. Stegmann e Horst G. Klein, EuroCom comprende dimensións políticas, lingüísticas e didácticas de plena actualidade e en clara liña co novo enfoque de ensino-aprendizaxe de linguas do Consello de Europa. O EuroCom pódese empregar como manual de aprendizaxe nas universidades, institutos e escolas de idiomas, baixo a supervisión de profesores que se dedicaron ao ensino de linguas estranxeiras diversas. É un complemento aos materiais e manuais existentes para a aprendizaxe das linguas que cada estudante poderá utilizar segundo as súas necesidades.
O seu obxectivo é promover o plurilingüismo entre europeos pola vía das competencias lingüísticas receptivas que se apoie na complexidade e na riqueza lingüística de Europa, e que poida conducir a unha verdadeira competencia paneuropea.
En 1999 o método EuroCom recibiu o Selo Europeo para Proxectos Lingüísticos Innovadores do Ministerio da Ciencia e dos Transportes de Austria, e en 2003 o ‘Premio per Studi sul Plurilinguismo’ do Centro Multilingue della Provincia Autonoma di Bolzano.