Tres bibliotecas da USC manteñen abertas as súas portas en horario extraordinario ata mediados de febreiro

As bibliotecas Concepción Areal e a da Facultade de Ciencias Económicas e Empresariais, en Santiago, e a Intercentros do Campus de Lugo manteñen ao longo do presente mes e ata o 15 de febreiro horarios extraordinarios de apertura coincidindo coa celebración do período de exames do primeiro cuadrimestre.
Deste xeito, os estudantes disporán de salas de estudo nestas bibliotecas en horario ininterrompido de 8:30 a 3:00 horas da madrugada, de luns a venres, e de 10 a 3:00 horas os sábados e os domingos. En total, son preto de 3.000 postos de estudo nas tres bibliotecas con horario extraordinario. A da Facultade de Ciencias Económicas dispón de preto de 350 postos, mentres que a Concepción Areal 950, e a Intercentros de Lugo ten ao dispor dos estudantes máis dun milleiro de postos.
A Biblioteca Xeral, no Colexio de Fonseca e con 200 postos de lectura, deixa de prestar servizo en horarios extraordinarios e fin de semana para dar paso á utilización da Concepción Arenal, con 950 postos, e á de Económicas, emprazada no Campus Norte da USC, con 350. O Consello de Dirección da USC, tras os estudos estatísticos realizados, considera que con esta distribución de postos de lectura nos dous campus composteláns se atende axeitadamente á demanda dos estudantes nos horarios de exames.