O Campus de Verán XuvenCiencia abre o seu prazo de inscrición este venres 3 de maio
A duodécima edición do Campus de Verán XuvenCiencia da USC abre o seu prazo de inscrición este venres 3, ás 15.30 horas, a través do formulario en liña que pode atoparse na súa páxina web. Esta iniciativa dirixida a estudantado de 3º e 4º da ESO, BAC e ciclos medios de Formación Profesional, manterá aberto o período de inscrición ata o vindeiro 12 de maio, ás 23.59 horas. A metade das prazas outorgaranse na orde da recepción da solicitude e a outra metade por sorteo entre todo o alumnado inscrito.
Obradoiros, visitas a centros de investigación do Campus de Lugo e da contorna da cidade, así como múltiples actividades de lecer integran o diverso programa desta iniciativa dirixida a estudantado preuniversitario e no que se involucra o conxunto de facultades e escolas do Campus de Lugo. Ademais, o alumnado poderá elixir entre proxectos de tipo biosanitario, científico experimental, de ciencias sociais e humanidades, nos que se achegarán ao día a día da investigación académica que se realiza na Universidade de Santiago de Compostela.
Entre as novidades desta edición, destaca o proxecto ‘Enfermaría, farmacia e medicina: traballando pola nosa saúde’ no que se desenvolverán actividades que mostren o coidado da saúde nas persoas. Toma de constantes vitais, realización de probas diagnósticas, manexo de materiais cirúrxicos para a realización de curas, administración de medicación subcutánea e control de sueroterapia, con contido teórico e práctico mediante simulación clínica, serán algúns dos contidos a desenvolver no marco deste proxecto para coñecer a situación clínica das persoas e a actuación en determinadas situacións onde hai alteración do estado da saúde. Esta actividade terá lugar no Hospital Universitario Lucus Augusti e na Escola Universitaria de Enfermaría.
A actividade ‘XuvenFeira: Tecnoloxías do futuro na EPSE. Heroínas con súperpoderes e Industria 5.0: Como o imperio construíu a Estrela da Morte’ permitirá coñecer, no Laboratorio de PEMADE, as vantaxes do emprego da madeira na construción das cidades e as múltiples posibilidades neste ámbito. Pola súa parte, o Laboratorio de Parasitoloxía acollerá o obradoiro ‘As carrachas, presuntas culpables’, no que se afondará nas carrachas que se poden atopar en Galicia e nas enfermidades que transmiten a través do desenvolvemento dun caso clínico.
Interactuar cos coidadores robóticos que nos acompañarán no futuro, así como aprender a combater os insectos pragas dun xeito respectuoso co medio ambiente, producindo e liberando inimigos naturais, será a meta da actividade ‘XuvenFeira: Tecnoloxías do futuro na EPSE. Aliens & Predators contra as pragas dos cultivos e Coidadores robóticos’, outra das novidades que ofrecerá XuvenCiencia no seu programa de actividades que se desenvolverá do 30 de xuño ao 6 de xullo no Campus de Lugo e que se atopa integrado por un amplo abano de actividades e de proxectos. O alumnado estará acompañado por Monitorado Científico da USC e pola tarde-noite con monitores titulados pertencentes á ADC Lumieira.
Campus Tecnolóxico
A Escola Técnica Superior de Enxeñaría tamén acollerá un Campus Tecnolóxico de Verán dirixido a alumnado preuniversitario, unha experiencia de inmersión en novas tecnoloxías e linguaxes de programación dende una concepción lúdica e totalmente práctica. A actividade, cuxa inscrición pode formalizarse a través dun formulario electrónico, está organizada en dúas quendas que terán lugar do 24 ao 28 de xuño, por unha banda, e do 1 ao 5 de xullo, pola outra. Este mesmo campus, organizado por PlayCode Academy, tamén terá lugar na Escola Politécnica Superior de Enxeñaría, nas mesmas datas.
Ao longo do campus o estudantado enfrontarase a desafíos técnicos que terán que resolver grazas aos seus coñecementos de programación e novas tecnoloxías: adestrar drons para realizar misións de exploración na fosa das Marianas, construír robots para misións perigosas e recollida de probas, deseñar traxes de mergullador intelixentes e un submarino completamente domotizado para facilitar a vida dos exploradores submariños. O alumnado terá que desenvolver solucións tecnolóxicas para resolver todos os retos aos que se vai enfrontar.