O catedrático Carlos Saá recibe a Medalla Ignacio Ribas da Real Sociedad Española de Química

O catedrático da USC Carlos Saá acaba de recibir a Medalla Ignacio Ribas correspondente a 2012 que outorga o Grupo de Química Orgánica da Real Sociedad Española de Química (RSEQ), integrado por 700 socios pertencentes a universidades e outros centros de investigación españois. A entrega celebrouse nun acto especial da reunión científica bianual que acaba de celebrar este grupo en San Sebastián e onde tamén se lle entregou a Medalla na súa edición correspondente a 2011 ao catedrático da Universidade de País Vasco Fernando Cossío. As Medallas Ignacio Ribas creáronse en 2010 para premiar anualmente a excelencia dun químico orgánico español polo seu labor científico dos últimos cinco anos. O galardón toman o seu nome do que fora catedrático da USC dende 1942 e durante máis de trinta anos deixando como legado unha escola compostelá de Química Orgánica cun gran prestixio internacional. Medallas Ignacio Ribas O profesor Ribas foi un dos promotores do Grupo de Química Orgánica da RSEQ e o seu primeiro presidente, así como do Colexio de Químicos de Galicia. Comezou a súa carreira investigadora de xeito independente convencido de que a verdadeira ensinanza superior era a investigación científica. O seu labor no laboratorio marcou unha nova liña de traballo nun momento no que na universidade española eran moi poucos os que desenvolvían investigación experimental. Dirixiu 68 teses de doutoramento e publicou preto de 150 artigos científicos. Ademais foi Premio Nacional de Investigación, Premios Galicia de Investigación, Medalla Castelao e doutor honoris causa pola Universidade de Palma de Mallorca.