Centos de alumnos de secundaria visitan a USC para coñecer de primeira man o mundo universitario

Dende hai varios cursos, a Universidade de Santiago desenvolve o programa ‘A Ponte entre o Ensino Medio e a USC’ coa fin de achegar aos estudantes de ensino medio o mundo universitario e responder as súas posibles dúbidas, que van dende a propia matrícula ou o número de prazas por titulacións ata as bolsas e saídas laborais das diferentes carreiras. Deste xeito, máis de 2.000 alumnos saen das súas aulas habituais e visitan ao longo desta semana os campus da Universidade de Santiago intentando decidir cal será a súa vocación máis acertada.
Esta edición do programa, que se repetirá en abril, ofrece a estes estudantes 15 percorridos diferentes en Santiago e 7 en Lugo coa pretensión de facilitar o coñecemento do camiño laboral máis axeitado. Nesta primeira quenda, á universidade compostelá acudiron alumnos de trinta centros dos que 23 son da provincia da Coruña, 1 de Lugo e 6 de Pontevedra.
Durante o encontro, os propios profesores de ensino medio valoraron moi positivamente unha iniciativa que axuda aos rapaces a tomar unha decisión ben meditada e indicaron que este tipo de programas serven para evitar erros importantes na vida do estudante. Deste xeito, os futuros universitarios reciben a información relativa ás titulacións que se imparten nos centros que visitan e coñecen as instalacións e dependencias propias de cada un.
PercorridosNo Campus Norte de Santiago, os participantes dos encontros elixen entre 5 percorridos diferentes: Filoloxía e Ciencias da Comunicación; Ciencias Económicas e Empresariais; Ciencias da Educación (Mestres) e Escola de Traballo Social; Enfermaría, Medicina e Odontoloxía; e Xeografía e Historia e Filosofía. Xa no Campus Sur escollen entre outros cinco: Dereito, Relacións Laborais e Ciencias Políticas e Sociais; Química e Física; Bioloxía e Farmacia; Matemáticas e Escola Técnica Superior de Enxeñaría; e Óptica e Optometría.
Os percorridos da tarde, que partiron ás 16:00 horas da Residencia Monte da Condesa, están pensados para que os visitantes coñezan o patrimonio histórico e cultural da USC así como os Institutos de Investigación e centros asociados. Así, os estudantes decidiron entre visitar o patrimonio histórico da Universidade, o Museo Luís Iglesias, o Centro Superior de Hostalaría de Galicia ou os institutos de investigación.
Campus de LugoNo Campus de Lugo participan nesta actividade preto de 250 alumnos de seis institutos das provincias da Coruña e Lugo. As visitas guiadas aos centros e facultades organízanse por grupos segundo o seu interese en estudar titulacións de Ciencias da Saúde, Enxeñaría Técnica Industrial, carreiras de Ciencias Sociais e Xurídicas ou Ciencias da Educación e Humanidades. Este ano, por primeira vez, para completar a estadía no campus e o coñecemento da cidade, son varios os institutos que realizan pola tarde unha visita guiada na que se inclúen os restos romanos e o Museo Provincial.